Lucija Rudan

Svakega je jutra na tvojoj ponistri
Tvoje lipo cviće dočekolo mene.
Ma nojdražji bi je i meni i tebi
Oni piter pun murtile zelene.

Svakega son jutra s motikon na rame
Pasovo polako priko tvoje kole.
Ništo me je uvik tin puten gonilo
Oli su me tamo tvoje žeje zvole.

Zno son svakeg jutra da ću na ponistri
Vidit ti obraze lipe i rumene.
I kako se srićno kroz bus od murtele
Sjaju tvoje zene droge i sarčene.

Uvik si mi dole hitila grančicu
I jo bin je buši i za uho stavi,
A ti bi pobigla u škurinu kuće
Kako da se strašiš od moje jubavi.

Nison te pito nikad kako je to bilo
Da si ti baš uvik, uvik cviće zalivala
Kad son jo pasovo pod tvojon ponistron;
Ma ni ti nis mene to nikad pitala...