Lucija Radan

Visoka je bila i suha i dreta kako svića
I uvijk je čorno nosila i čornu mohramu
Nabila povar čela i uvik soma hodila priko sela
Somo je ona bidno znala
Èa je to uvik okolo iskala

A kad bi se počelo mročit
Na jedon kamik bi stala
I niz more gledola, uvik je nikoga čekola
A kad bi došla nevera
Ruke je povar glave lomila i sarce pritiskala

Govorili su da je mlodega imala
Borkon je iša u Split kamaru kupit i onda se oženit
Vraćo se doma i misli Mariju razveselit
Ma brod se u neveri na siki razbi i on se utopi
I nikad ga nisu našli

A ona ga je uvik čekola, čekola i ostarila, a ni ga dočekola
Dica su se od nje strašila i jo
A kad bi se prima nami makla mi bi pobigli
Da nas ne bi dotakla suhin parstima
A bidna teta Marija itila nas je somo pogladit

Visoka je bila i suha i dreta kako svića
I uvijk je čorno nosila i čornu mohramu
Nabila povar čela i uvik soma hodila priko sela