Krešimir Magdić / Jakša Fiamengo

U zemju latinsku kad je parti dida
Zlamena se, Bogu na voju se prida,
Pustija je meje, zaplaka kraj zida
U zemju latinsku kad je parti dida.

Ko zna ča je tislo bodula u svit
More li bez loze igdir boje bit?
Je li mu još fale briškula i zog
I cvrčak s rogača ča sviri ka Bog?

Ure s kampanela stale su od bola
Cila ga je vala pratila do mola
Nevoja je bila, još se pripovida
U zemju latinsku kad je parti dida.

Grumen svete zemje na domaćen vitru
Vridi li to minjat za vražju salitru?
Tri je puta vapor trumbetom zarida
U zemju latinsku kad je parti dida.